ලංකාවේ සේවය කළ ඉංග්‍රීසි සිවිල් නිළධාරියෙකු වූ ලෙනාර්ඩ් වුල්ෆ් ගේ
"ද විලේජ් ඉන් ද ජන්ගල්" නවකතාව "බැද්දේගම" නමින් සිංහලට පරිවර්තනය කර තිබුණේ ඒ.පී. ගුණරත්න විසිනි.
බැද්දේගම නවකතාව ලියා ඇත්තේ ලංකාවේ වියළි කලාපයේ කැලෑ ගමක මිනිසුන්ගේ ජීවිත ඇසුරු කරගෙනය. ඔහු සිවිල් නිළධාරියෙකු ලෙස සේවය කළ නිසා එම ගැමි ජනතාවගේ ජීවිත කදිමට නිරූපණය කර ඇති බව රසිකයා වටහා ගන්නේ නවකතාව හොඳින් කියවා තේරුම් ගැනීමට පුළුවන් වූ පසු කාලයේ ය.
රසිකයාට මේ කතාව මුලින්ම කියවන්නට ලැබෙන්නේ සතුට පත්තරේ චිත්‍රකතාවකිනි.බැද්දේගම නවකතාව ඇසුරින් නිර්මාණය කළ ඒ චිත්‍රකතාවේ නම "සිලිඳු" ය. චිත්‍රකතා ශිල්පියා ඩී.කේ. සිරිපාල ය. "සිලිඳු" චිත්‍රකතාව සතුට පත්තරේ ආරම්භයේ සිට පළ වී කොටස් 14 කින් අවසන් වෙයි. තාත්තා සිලිඳු කතාව පොතක් ලෙස හදා තිබුණෙන් නැවත නැවත කියවීමට රසිකයාට අවස්ථාව ලැබුණේය.
නවකතාවේ ප්‍රධාන සිද්ධි පමණක් තෝරා ගෙන චිත්‍රකතාව ගොඩ නඟා ඇති බව රසිකයා දැන ගත්තේ බැද්දේගම පොත කියවද්දීය.
පුන්චිමැණිකා හා බබුන් අප්පු අතර ඇති වෙන ආදර අන්දරය ද මේ කටුක ජීවිත අන්දරය හා වෙළී ඇත.
බැද්දේගම නවකතාව ඇසුරින් නිෂ්පාදනය කළ චිත්‍රපටය රසිකයා නැරඹුවේ හතේ පංතියේ ඉගෙන ගනිද්දීය. එය අධ්‍යක්ෂණය කළේ ලෙස්ටර් ජේම්ස් පීරිස් ය. ජෝ අබේවික්‍රම, මාලනී ෆොන්සේකා, විජය කුමාරතුංග, ටෝනි රණසිංහ, ආදී ප්‍රවීණ නළු නිළියන් එහි රඟ පෑ බව රසිකයා දැන් දන්නේය.
නවකතා, කෙටිකතා පිළිබඳව රසිකයා තුළ උනන්දුවක් ඇති වන්නේ මෙවැනි චිත්‍රකතා කියවීමෙන් බව පැවසීම අතිශයෝක්තියක් නොවෙයි.
©සු.ප්‍රි. සමරසිංහ
No comments:
Post a Comment