COMIC ARTIST INFORMATION

8. ජනක රත්නායක මහතා 

  Mr. Janaka Rathnayaka 

 

තාරුණ්‍යයේ රිද්මය සිත්තම්  කළ 

"ජනක රත්නායක "

චිත්‍රකතාව උන්මාදයක් නම්, ඒ උන්මාදයයෙන් තරුණ පරම්පරාව වසඟයට ගත් ප්‍රවීණ චිත්‍රකතා කලාකරුවා  ඔහුයි. තාරුණ්‍යයේ රිද්මයෙන් චිත්‍රකතාව විචිත්‍රවත්  කළ ජ්‍යේෂ්ඨ චිත්‍රකතා කලාකරුවා  ඔහුයි.

                      

*ජීවන තොරතුරු :

ඔහු ඉපදුණේ කැලණිය කිරිබත්ගොඩ දී ය. අධ්‍යාපනය හැදෑරුවේ කොළඹ නාලන්දා විද්‍යාලයෙනි. පාසලේ දී විද්‍යා විෂය හදාරන්නට සිදුවුණත් ඔහුගේ සිත ඇදී යන්නේ කලාවටය. විශේෂයෙන්ම චිත්‍රකතා කියවන්නටත් අඳින්නටත් ඔහු ඉතා ප්‍රිය කළේය. ඒ අතර පාසල් සමරු කලාපයේ චිත්‍ර ශිල්පියා ලෙස කටයුතු කරන්නට ලැබීම ඔහු ලද මහඟු අවස්ථාවකි.

*කලා දිවිය:

1969 අප්‍රේල් මස 07 වැනිදා සිට ටිකිරි පත්තරයට ඇඳි "බව්වා" නම් විකට චිත්‍රකතාව ඔහු ගේ චිත්‍රකතා ජීවිතයේ ආරම්භයයි. 

දවස ආයතනයේ ටිකිරි ළමා පත්තරයේ චිත්‍ර ශිල්පියෙකු ලෙස කටයුතු කිරීමට අවස්ථාව හිමි වන්නේ ඔහුගේ චිත්‍ර ඇඳීමේ හැකියාව නිසාය. පසුව දවස ආයතනයේම ප්‍රකාශනයක් වූ ' වීක් එන්ඩ්' පත්තරයේ ප්‍රධාන චිත්‍ර ශිල්පියා ලෙස කටයුතු කරන්නට අවස්ථාව ලැබෙයි.

*චිත්‍රකතා රිද්මය:

"...ජනක රත්නායක තරුණ පරපුරේ වැඩි ජන ප්‍රසාදයක් දිනාගත් චිත්‍රකතා ශිල්පියා ලෙස සඳහන් කළ හැකිය. ඔහු වඩාත් ජනප්‍රිය වූයේ තාත්වික සම්ප්‍රදායේ චිත්‍ර නිරූපණ තුළිනි.සැබෑ ජීවිතය පසුබිම් කරගත් රූපරාමු ක්‍රමය නිසා ජනක රත්නායක තරුණ පරපුර අතර වැඩි ප්‍රසාදයක් දිනාගෙන ඇත. 

.....බොහෝ චිත්‍රකතා බටහිර සම්ප්‍රදායට නැඹුරු වුවද දේශීය පසුබිමක සජීවී රූපරාමු ඉදිරිපත් කරමින්  ජනක රත්නායක චිත්‍රකතා කරණයට දැක්වූ කැපවීම නව පරපුරේ බොහෝ ශිල්පීන්ගේ ආදර්ශයටත්, ප්‍රසාදයටත් පාත්‍රවිය....

නව පරපුර සංකේතවත් කරන ප්‍රධානම චිත්‍ර ශිල්පියා ලෙස ජනක රත්නායක කැපී පෙනේ.

එහෙත් ඔහුගේ බොහොමයක් චිත්‍රකතා සැබෑ සමාජය හා සමීප වූයේ චිත්‍ර නිරූපණය තුළින් පමණක් බැව් පෙනේ. යතාර්ථවාදී ප්‍රවේශයට වඩා තාත්විකවාදී ප්‍රවේශය ජනකගේ චිත්‍රකතා වල දක්නට ලැබුණි."

"ශ්‍රී ලාංකික චිත්‍ර ශිල්පීන්ගේ පරපුරට අයත් ප්‍රකට මෙන්ම ප්‍රවීණතම චිත්‍ර ශිල්පියෙකු ලෙස ජනක රත්නායකයෝ බුහුමනට පාත්‍රව සිටිති. චිත්‍ර ශිල්පියද වෙනත් ඕනෑම කලා කරුවෙකු මෙන් ස්වකීය මාධ්‍ය මගින් රසිකයාට අපූර්ව සෞන්දර්යාත්මක වින්දනයක් ලබා දෙන්නෙකි. දසක හතරකට ආසන්න කාලයක් මුළුල්ලේ ජනක රත්නායක විසින් ඉටු කරන ලද්දේත් මෙම සද්කාර්‍ය යැයි මම සිතමි.

ඔහුගේ වර්ණ භාවිතය, ශෛලිය මෙන්ම චිත්‍ර නිර්මාණය ද ප්‍රබල ජීවයකින් යුතුය. දුක, සෝකය, කෝපය වැනි මිනිස් ස්වභාවයන් සියුම් රේඛාවකින් පිළිබිඹු කිරීටය ජනක දක්වන්නේ අප්‍රමාණ කුසලතාවකි. ඔහු ස්වභාවෝක්තිය ගරු කරයි. චිත්‍රය ආඛ්‍යානයේම ගාම්භීරත්වය විදහා පාන අගනා ප්‍රකාශනයක් ලෙස ජනක අදහයි."(ගාමිණී සුමනසේකර, ප්‍රවීණ මාධ්‍යවේදී, දිවයින- උපුටා ගැනීම කබලෙන් ලිපට චිත්‍රකතා පොතින්)

*නිර්මාණාත්මක අත්සන:

චිත්‍රකතා වල යෙදූ "ජනක රත්නායක" යන ඔහුගේ නම ඔහුටම අනන්‍යය වූ නිර්මාණශීලී අත්සනකි. එය චිත්‍රකතා රසිකයින්ගේ හද බැඳ ගැනීමට තරම් ආකර්ෂණීය විය. 

*චිත්‍රකතා:

• ටිකිරි-බව්වා 

• ස්වර්ණ-ආදර නිමන්ති

• සිත්තර-කැලෑ අස්සයෝ, සැලී

 

• දිවයින ඉරිදා සංග්‍රහය-කොළ රතු නිල්, හිරුට හොරෙන් පිපුණු මලක්, සිහින නිම්නය, කුමාරයාණනි, පාට පාටින් හීනයක්, බීරලු රේන්ද, වැලමිට වංගුව, ලාකඩ උයන 

• සතුට-කබලෙන් ලිපට, අත්තික්කා මල්, පාට පාට හීනයක්, සුසීමා, යළි පිපුණු මලක්, කිව්.කේ. 8.5, සාගරය පරදා, කළු පරවියෝ, 

• විජය සතුට-වඩදිය බාදිය, 

• විසිතුර-බළලා, අන්තිම සතිය, ෂූටිං

• ඉරිදා  මව්බිම-අත්තික්කා මල්

• ජනතා-මුහුදු ළිහිණි, අහස උසට 

• සරසවිය-සාරංගා 

• කුමරි-එදා මගේ හද අරගත්

• චිත්‍රමිත්‍ර-ඉරා අඳුරු පට, කලු සුදු අස්සයෝ, උකුසු පිහාටු, පින්න මිදුන පළස මතින් 

• තරුණි-පාරාදීසිය 

• Fortune-The Wild Horses

• යොවුන් ජනතා-සීත රෑ යමේ

• හිතවත -අග මැද මුල, මල් සැණකෙළිය, සුළං කුරුල්ලෝ

• ශ්‍රී සඟරාව-කඳුළු අතරින්, සිතාරයේ තත් අතරින්, පියස්ස නැති ගෙයක් 

• සිරිතරු-සිහිනයේ මායාව

• මධුර-කළු පරවියෝ

 

ආදී ඔබේ මතකයේ සිතුවම්ව ඇති බොහෝ චිත්‍රකතා ප්‍රමාණයක් 'ජනක රත්නායක' යන ආදරණීය අත්සනින් යුතුව චිත්‍රකතා ලෝකයට තිළිණ කර ඇත.

*චිත්‍රකතා පොත්:

• කුමාරයාණනි

• කබලෙන් ලිපට

• සුදු කලු අස්සයෝ

*සිනමාවට නැඟුණු චිත්‍රකතා :

• කබලෙන් ලිපට- (අධ්‍යක්ෂණය දයානන්ද රුද්‍රිගු-1979 (චිත්‍පටිය-සුගන්ධි)

• සාරංගා (අධ්‍යක්ෂණය ගාමිණී හේවාවිතාරණ-1981)

• යළි පිපුණු මලක්- (අධ්‍යක්ෂණය ඇන්ටන් ග්‍රෙගරි-1983)

*ටෙලි නාට්‍යයට නැඟුණු චිත්‍රකතා :

• සුසීමා (2011, අධ්‍යක්ෂණය රොහාන් වැලිවිට)

• කුමාරයාණනි (අධ්‍යක්ෂණය සිඩ්නි චන්දසේකර )

*චිත්‍රකතා රටාව:

සිය චිත්‍රකතා ශෛලිය පිළිබඳව ඔහු මෙසේ  අදහස් දක්වා තිබුණා.

"මම මුල් කාලයේ සිද්ධියක් මුල්කරගෙන චිත්‍රයට නැඟුවා මිසක් ඒ ඒ ස්ථාන නම් තෝරා ගත්තේ නැගැ. නමුත් ඒ ඒ ස්ථානම තෝරා ගත්තේ නැහැ. නමුත් ඒ ඒ ස්ථානම  චිත්‍ර ගොඩ නැගීමේදී තෝරා ගැනීම සාර්ථකත්වයට තුඩුදෙන  බව වටහා ගත් මම ඒ ඒ ස්ථාන කරාම ගොස් ඒ ආශ්‍රයෙන් චිත්‍ර ගොඩ නැඟුවා. 

මේ රටේ නව පරපුරේ සිතුම් පැතුම් තේරුම් අරගෙන නූතන විලාසිතා අනුව චිත්‍ර අඳින්නට මම පෙරමුණ ගත්ත. අළුත් සමාජේ තරුණ තරුණියන්ගේ කොණ්ඩා මෝස්තර, ඇඳුම් පැළඳුම් ආදිය හැකි තරම් අත්දැකීම් ඇසුරින්  චිත්‍රයට ගොඩ නගන්නට මෙතෙක් උත්සාහ ගත්තා." (දයාරත්න රටගෙදර,  ජනක රත්නායක සමග කළ පුවත්පත් සාකච්ඡාවකිනි)

දවස ආයතනයෙන් බිහිවූ මේ චිත්‍රකතා කලාකරුවා ලේක්හවුස් ආයතනයේ හා උපාලි පුවත්පත් ආයතනයේ  චිත්‍ර ශිල්පියෙකු ලෙස නිර්මාණ බිහි කළේය. වර්තමානයේ මව්බිම පත්තරයේ ප්‍රධාන චිත්‍ර ශිල්පියා ලෙස කටයුතු කරයි.

චිත්‍රකතාවෙන් තාරුණ්‍යයට කතා කළ, රසිකයින්ගේ සිත් අමානන්දයට පත් කළ චිත්‍රකතා ලෝකයේ දැවැන්තයාට අපේ ගෞරවය හිමිවිය යුතුමය.

නිදුක් නිරෝගීව චිත්‍රකතා ලොව සරසන්නට ඔබ තුමාට වාසනාව ලැබේවා යනු "පත්තර අරණ " ප්‍රාර්ථනයයි !

චිරං ජයතු චිත්‍ර කතා කලාකරුවාණනි !

(සුප්‍රි සමරසිංහ )

supprisamarasinghe@gmail.com

# ස්තුතිය-

*උපුටා ගැනීම් සිදු කළ සියලු මූලාශ්‍රයන්ට හා ඒවායේ නිර්මාණකරුවන්ට.

*Sri Lankan Comics (ශ්‍රී ලංකා චිත්‍රකතා) සමූහයට

*SATHUTA සතුට සමූහයට

*ප්‍රසංග පිගේරා හිතවතාට 

සහ තොරතුරු ලබා ගැනීමට සහය වූ සියලු දෙනාටම

*නිමන්සා, නිර්මල හා  ජාතික චිත්‍රකතා පදනම යන ප්‍රකාශන වලට

# පරිශීලනය කළ පොතපත සහ වෙනත් මූලාශ්‍ර -

• චිත්‍ර කතාවේ සමාජ මුහුණුවර-නිසිත වර්ණසූරිය

• දයාරත්න රටගෙදර,  ජනක රත්නායක සමග කළ පුවත්පත් සාකච්ඡාවක් 

• සුපිරි ගේ කොලම 

• අන්තර් ජාලය

👈සිත් තරු වරුණ -7

සිත් තරු වරුණ -9 👉